كل ليلة عيني فالسما و نتا عارف
بلي نقلب عليك بالريق الناشف
ونتا حالف
ماتبان ولو ضيق الدنيا عليا
ولو الطريق تريب تحت رجليا
ياك عيني عيات تقلب عليك تشوف صورتك
ياك بينا صلاة ماتنكث الوعد فغيبتك
ياك ديني نتا و مأمنة بيك وبلي فسريرتك
جيت نتجارا نسابق الموارا قدام بابك واقفة نرجاك
رجايا فنور يشع منك و يضوي عليا نلقاك
الميمة كل يوم لحياتنا تطلب الدوم
مافراسها بلي القدار فقلبي خشات خنجر مسموم
ماعرفات بلي النجمة فسمايا طفات
مافراسها بلي شمعي قليل و ليلي طويل ماعندو نهاية
گفضت جلايلي هربانة الغوت ورايا قاصدة البحر
تحت الگمرة حافظة غنايا و دموعي بكايا تنافس ما البحر
عمت فهموم كحل من الحموم الخير فغدا ماعندي زهر
سمعت صوات وسط صوت الموج تنادي عليا تهضر
حتى خرج الغول من وسط الموجة السابعة يقطر
من يدي شدني عرفني تلفانة على الطريق جا يغولني
عرف بلي طريق حبك متاهة ولي دخل ليها يبات يعاني
عرفك غايب وجا فصيفتك هارب لجيهتي لقاني
حبك عماني
وما قاومت وما ميزت شرو المخبي ورا صيفتك بلعاني
غولني الغول و ما أدت ماتبعت السنة
جرني من يدي و أنا عند بالي نتا جيتي من ورا البحر تديني معاك
ماكان ليا جهد حيث ملقايا معاك فعيني جنة
لوانو المبدلة بانت للعيان من بعد ماهناك مني و تهنى.
سلوى مشهور – مدينة سلا
اترك تعليقا